Müəssisə Haqqında Rəyin (İmicinin) Formalaşması
Müəssisə hansı yolla bazarda nəzərə çarpır, istehlakçıların etibarını və üstünlüyünü qazanır? Bu məsələ müəssisənin yaranması və sonrakı inkişafı dövründə ən vacibi və əhəmiyyətlisidir. Müəssisənin imici dedikdə nə başa düşülür? Obrazlı desək, bu «ictimai rəy güzgüsündə» müəssisənin «simasıdır». Yəni müəssisənin fəaliyyəti və uğurları haqqında, onun real və potensial alıcıları ilə münasibətləri, rəqabətədavamlığı, maliyyə göstəriciləri haqqında ictimaiyyətdə formalaşan rəydir.
Müəssisənin imicinin formalaşdırılması çox mürəkkəb, uzun müddətli və çox sahəli prosesdir. İmicin formalaşdırılması ilə həll edilən məsələlər bunlardır: müxtəlif reklam üsulları ilə ictimaiyyətin diqqətinin cəlb olunması; müəssisənin fəaliyyəti və istehsal etdiyi məhsula ictimaiyyətdə müsbət rəyin yaradılması; müəssisəyə qarşı xoş hisslərin, arzuların formalaşması; müəssisənin istehsal etdiyi məhsula istehlakçı marağının artırılması. Müəssisənin imicinin əsas elementləri kimi xidmət səviyyəsi, ofisinin xarici və daxili görünüşü və səliqəsi, onun hansı ərazidə yerləşməsi amillərini; müəssisənin işçilərinin xarici görünüşü və peşəkarlıq səviyyəsini; qeyri kommersiya fəaliyyətini (xeyriyyəçilik və s.); reklamı qeyd etmək olar. Müəssisənin məhsulunun qablaşdırılmasının və qabının da əhəmiyyətli dərəcədə təsiri vardır. Bunun əhəmiyyəti müəssisədə gündəlik tələbat, qida məhsulları, sağlamlığa və təhlükəsizliyə təsir edən məhsullar istehsal edildiyi halda daha çox artır.
Müasir biznesdə imic həm də iş adamının xarici görünüşü deməkdir. Bunun vasitəsilə müştərilərlə etibarlı işçi əlaqələr və münasibətlər qururlur. Bundan başqa uğurlu iş adamı imicini onun peşəkarlıq səviyyəsi, təhsili, zəngin təcrübəsi, orijinal və qeyri standart düşüncə qabiliyyəti də yaradır.
| 
